"સર, પછી શું થયું પેલું?"
"કેમ? હિન્ડનબર્ગ રિપોર્ટ તો આવી ગયો. હવે શું થવાનું બાકી છે?"
"અરે, સર! તમે વૈશ્વિક સ્તરથી થોડા નીચે ઉતરો. હું તો પેલી તમારી ચોપડીની વાત કરતો હતો. એ ક્યારે બહાર પડવાની છે? એની શું પ્રાઈસ છે? એની પર શું ડિસ્કાઉન્ટ છે? એ ક્યાંથી મળશે?"
"ઓહ! એમાં શું છે એ અંગે તમને સહેજ પણ જિજ્ઞાસા નથી, મિત્ર?"
"સર, સાચું કહું ને તો, તમારી નહીં, કોઈ બી ચોપડીમાં હોઈ હોઈને શું હોવાનું? એનું એ જ જ્ઞાન, એની એ જ ફિલોસોફી, પોતે સુપિરિયર હોવાનો દાવો, ગૂગલ પરથી લીધેલી માહિતી...!"
"તો પછી તમને એની પ્રાઈસ, ડિસ્કાઉન્ટ ને એ બધામાં શો રસ?"
"સર! મારા બાપાએ બાળપણથી મને શીખવ્યું છે કે હંમેશાં જરૂરતમંદ માટે કંઈક કરી છૂટવું. આપણે એ સંસ્કાર હજી જાળવી રાખ્યા છે. ગમે એવી વાહિયાત ચોપડી હોય તો પણ હું દસ પંદર ખરીદીને મિત્રોને ભેટ આપતો હોઉં છું."
"મને આપનું બજેટ જણાવશો? તો શું કે કોસ્ટિંગ એ મુજબ સેટ કરાવું."
"સર, બજેટ નો ઈશ્યુ. પણ દોઢસો સુધી ચાલે."
"ઓકે. તમે કેટલી, સોએક નકલ લેવાના?"
"સર, સર! તમે આ સવાલ મને દસ વરસ પહેલાં પૂછ્યો હોત તો હું સો નહીં, બસો કહેત. પણ હવે મારી પાસે મિત્રો જ રહ્યા નથી."
"આયેમ સોરી. એ બધા કોરોનામાં.....?"
"અરે, ના સર. કોરોના તો પછી આવ્યો. આ ચોપડીઓ વહેંચવાની મારી પ્રવૃત્તિ નડી ગઈ."
"ઓહ, સો સોરી! તમે મિત્રતાના ભોગે આ સત્કાર્ય કરો છો એનો આનંદ છે. પણ મારે હવે નવેસરથી કોસ્ટિંગ કરાવવું પડશે. ત્યાં સુધી તમે થોડા નવા મિત્રો બનાવી લો. ઓકે?"
"થેન્ક યુ, સર! આજકાલ વાચકની વ્યથા સમજે એવા લેખક જ ક્યાં રહ્યા છે? એક આ તમે અપવાદ નીકળ્યા."
"તમે નસીબદાર કે તમને એક જ અપવાદ મળ્યા. અમારે તો અપવાદ જ અપવાદ છે. મારું બેટું, કોઈ એવું મળતું જ નથી કે નિયમ સાબિત કરે."
"સર, એ તો જેવું જેનું ફિલ્ડ, હેં ને!"
No comments:
Post a Comment