"સર, અભિનંદન!"
"ભઈ, શેના અભિનંદન? મને એકે પદ્મ પુરસ્કાર નથી મળ્યો એના?"
"સર, એટલા બધા વિનમ્ર ન બનો. નહીંતર કોકની આંખે ચડી જશો અને તમને એ મળી જશે તો પછી મુશ્કેલી થશે."
"અરે યાર! કોકની આંખે નથી ચડાતું એ જ તો તકલીફ છે. પ્લીઝ, કંઈક ગોઠવો ને આપણું?"
"આપણું? મારે એની જરૂર નથી. અને તમારી એ લોકોને જરૂર નથી. પછી કેમનું ગોઠવાય? પણ આ બધામાં તમે આખી વાતને આડે પાટે ચડાવી દીધી."
"જુઓ ને, હું એમ કહેતો હતો કે તમારા હાસ્યલેખોની સુપરહીટ બુક 'સળી નહીં, સાવરણી' પછી તમે એવી જ સુપરહીટ બીજી બુક લઈને આવી રહ્યા છો એવું જાણવા મળ્યું."
"એક મિનીટ, બ્રો! તમને આવી ખોટી માહિતી કોણે આપી?"
"કઈ ખોટી માહિતી? તમે નવી બુક લઈને આવી રહ્યા છો એ?"
"અરે , ના યાર! મારી આગલી બુક સુપરહીટ હતી એ!"
"ઓહ સર! તમેય શું? સાચું માની ગયા? આ તો શ્રાવણ માસની આગળ જેમ 'પવિત્ર' લખીએ એના જેવો વહેવાર છે."
"હા...આ....શ!"
"એટલે તમે હાસ્યની નવી સુપરહીટ બુક લઈને આવી રહ્યા છો એ તો સાચું ને?"
"હા ભઈ! એની ના નહીં પાડું. પણ એની વિગતો હમણાં નહીં આપું, હોં! શું કે પછી બધા પૂછપૂછ કરે ને આપણને ખબર ન હોય તો નીચાજોણું થાય, યુ નો!"
"સર, ટુ બી ઓનેસ્ટ એન્ડ ફ્રેન્ક, કોઈ કાકોય તમારી બુક વિશે પૂછવા નવરો નથી. આ તો શું કે, મને ડાયરેક્ટ પ્રેસમાંથી ખબર પડી એટલે થયું કે લાવો, તમને સરપ્રાઈઝ આપીએ. ઓકે? તમતમારે જલસા કરો હોં! કોઈ તમને ડિસ્ટર્બ નહીં કરે."
"આભાર, દોસ્ત! વધુ વિગતો ટૂંક સમયમાં હોં!"
"જેને જોઈતી હોય એને આપજો."
No comments:
Post a Comment