"વેલકમ, સર! અમારા 'ચોપડીને ચોપડો' કાર્યક્રમમાં આપનું સ્વાગત છે."
"ભાઈશ્રી, પહેલાં તો તમે તમારા કાર્યક્રમનો ઉચ્ચાર સરખો કરતાં શીખો. 'ચોપડી ને ચોપડો' એમ બોલાય. અહીં 'ને' એટલે 'અને' સમજવું. 'અ'નો અહીં લોપ થાય છે. ચોપડી નારી જાતિ અને ચોપડો નરજાતિ. લિંગભેદ થકી અહીં વિરોધાભાસ પેદા થાય છે અને એ બન્નેનો આ કાર્યક્રમમાં સમન્વય હશે એમ ધારું છું."
"સોરી સર, પણ મહેમાન તરીકે આવ્યા છો તો મહેમાનની જેમ જ વર્તો. તમને એમ હશે કે ગુજરાતી વ્યાકરણ તમને એકલાને જ આવડે. તો સાંભળો. આ કાર્યક્રમની વિભાવના હતી 'ચોપડીને મણમણની ચોપડો.' ખરેખર તો કર્મણિ પ્રયોગ અનુસાર 'ચોપડાવો' આવે, પણ આપના જેવા વિદ્વજ્જનોને ગોથું ખવડાવવા માટે અમે 'ચોપડો' રાખ્યું. 'મણમણ' શબ્દસમૂહનો અહીં લોપ થાય છે. હવે આપણે કાર્યક્રમ શરૂ કરીશું?"
"!!!!!"
"મિત્રો, 'ચોપડીને ચોપડો' કાર્યક્રમમાં આજે જે ચોપડીને આપણે ચોપડવાની છે એનું નામ છે 'સાહિત્ય-બાહિત્ય'. એના લેખકશ્રી આજે અમારા સ્ટુડિયોમાં ઉપસ્થિત છે. સ્વાગત છે, સાહેબ. પધારો."
"નમસ્તે."
"સર, સૌથી પહેલાં મને એ કહો કે આપની ચોપડીને આમ તો વાચકો ચોપડાવે છે. એને બદલે આપે ચોપડીનું નામ જ એવું રાખ્યું કે જાણે આપ પોતે જ એને ચોપડાવતા હો એમ લાગે છે. આનું કારણ શું?"
"આત્મનિર્ભરતા."
"આપ બહુ નિખાલસ છો, સર! આ ચોપડી લખવાની પ્રેરણા આપને શી રીતે મળી?"
"લેખકોને પ્રેરણાઓ શી રીતે મળે એ બાબત લેખક કરતાં વાચકો વધુ જાણતા હોય છે. એટલામાં સમજી જાવ."
"ધેટ્સ વન્ડરફૂલ. નાઉ આ ચોપડીના કન્ટેન્ટ વિશે કંઈક કહેશો?"
"ના, નહીં કહું. અરે, ગમ્મત કરું છું. તમે મને અહીં કહેવા માટે તો બોલાવ્યો છે, તો વાક્યના છેડે પ્રશ્નાર્થચિહ્નને બદલે પૂર્ણવિરામ જ રાખો ને!"
"સર, અમારે શું કરવું એ આપ ઑફ્ફ ધ માઈક કહેશો. અત્યારે હું પૂછું એટલાનો જવાબ આપો."
"તમે મને અહીં ઈન્ટરવ્યૂ માટે બોલાવ્યો છે કે ઈન્ટરરોગેશન માટે?"
"ઓહ...માય...માય...! યુ આર વેરી સ્માર્ટ, સર! એકચ્યુલી અમારા ઈન્ટરવ્યૂ ઈન્ટરરોગેશન લેવલના જ હોય છે. આપે તરત પકડી પાડ્યું, હોં! આમ તો કહેવાય નહીં, સર, પણ એક ગેસ્ટ આ કાર્યક્રમમાં આવેલા તો એમને અમારા સવાલથી એટલો પસીનો છૂટી ગયેલો કે અડધો ડઝન નેપકીન ઓછા પડેલા."
"પેપર નેપકીન?"
"સર, આપ ધાર્યા કરતાં વધુ સ્માર્ટ નીકળ્યા. ગમે એ કહો, પણ આપ લેખક લાગતા નથી. આમાં આવ્યા એ પહેલાં આપ શું કરતા હતા?"
"હું નીચે મારી સાયકલ પાર્ક કરતો હતો. બહુ મથ્યો, પણ સ્કૂટરો એટલાં બધાં નજીક ગોઠવાયેલાં કે મારી પાતળી સાયકલ એની વચ્ચે જઈ જ ન શકી. આથી મારે આવવામાં ત્રીસ સેકન્ડનો વિલંબ થયો."
"ધેટ્સ નથિંગ, સર! અમે અહીં ત્રીસ મિનીટ મોડા આવીએ તોય પંચ થઈ જાય."
"આપણામાં કહેવત છે ને કે પંચ ત્યાં પરમેશ્વર. પણ તમે મને મારી ચોપડીના કન્ટેન્ટ વિશે પૂછતા હતા."
"વેલ સર, ધ ટાઈમ ઈઝ અપ નાઉ. હવે ફરી ક્યારેક અમારા કાર્યક્રમમાં તમને આવવાનો લાભ મળે ત્યારે વધુ વાત કરીશું."
"વાત મારે કરવાની છે કે તમારે?"
"તો દર્શક મિત્રો, આપે જોયું કે આપણા આ કાર્યક્રમમાં આપણે 'સાહિત્ય-બાહિત્ય' નામની આ ચોપડીને કેવી ચોપડાવી દીધી. આ નિર્ભયતા જ અમારા કાર્યક્રમની પિછાણ છે. અને આપ સૌના પ્યાર થકી જ એ અમે લાવી શક્યા છીએ. અમારા આ કાર્યક્રમમાં ચોપડાવવા લાયક ચોપડીઓનાં સૂચન આપ અમને મોકલી શકો છો. આપનું નામ ગુપ્ત રાખવામાં આવશે. અમારો આ કાર્યક્રમ આપને કેવો લાગ્યો એનો પ્રતિભાવ આપ અમને વૉટ્સેપ પર મોકલી શકશો. સર્વોત્તમ માટે 1, ઉત્તમ માટે 2 અને સારો માટે 3 ટાઈપ કરશો. અમારો વૉટ્સેપ નંબર છે...."
"... 98252 90796, કાર્તિક શાહ. પુસ્તકની કિંમત ર..130/, વળતર સાથે 120/, પોસ્ટેજ ફ્રી. સાર્થક પ્રકાશનની વેબસાઈટ પર એ મૂકાય ત્યાં સુધી આપ વૉટ્સેપ દ્વારા ઓર્ડર નોંધાવી શકશો. જયહિંદ."
"અરે સર! તમે અમારા કાર્યક્રમમાં તમારો એજન્ડા ક્યાં ઘૂસાડ્યો?"
"તમે જ શીખવ્યું. ગુડબાય, દર્શકમિત્રો!"
