ચીની ચાઉમાઉ, એનો દીવાન હાઉવાઉ (5): હાઉવાઉનું સ્વપ્નું

ચીની રાજા ચાઉમાઉના દીવાન હાઉવાઉને એક વાર સ્વપ્નું આવ્યું. સ્વપ્નામાં એણે જોયું તો પોતે ગુજરીમાં મરઘી વેચવા ગયો હતો.

એક માણસ એ મરઘી ખરીદવા આવ્યો.

હાઉવાઉએ કહ્યું: 'મારી મરઘી બહુ ફક્કડ છે; જાડી છે, તગડી છે, અને અચ્છેર અચ્છેરનું ઈંડું મૂકે છે!'

પેલો માણસ આભો બની ગયો. આવી મરઘી એણે ક્યાંય જોઈ નહોતી. તેણે કહ્યું: 'શું કહો છો?' એવી ફક્કડ મરઘી છે? બોલો, શું લેવું છે એનું? મારે જેવી જોઈએ છે તેવી જ મરઘી છે આ!'

હાઉવાઉએ કહ્યું: 'એક રૂપિયો!'

ઘરાકે કહ્યું: 'ઊંહું!ઊંહું! પચાસ પૈસા.'

હાઉવાઉએ કહ્યું: 'નહીં, એંશી પૈસા!'

ઘરાકે કહ્યું: 'ઊંહું!ઊંહું! સાઠ પૈસા!'

હાઉવાઉએ કહ્યું: 'એંશી પૈસામાં એક ઓછો નહીં!'

ઘરાકે કહ્યું: 'સિત્તેર પૈસાથી એક વધારે નહીં! દેવી હોય તો દો, નહીં તો જાઉં છું.'

હાઉવાઉએ કહ્યું: 'તો જા-'

'જા' કહેતાંમાં હાઉવાઉની ઊંઘ ઊડી ગઈ. જાગીને જુએ તો મરઘી શું, ને કાંઈ શું?

તે બોલ્યો: 'ઓહ, જબરી ભૂલ થઈ ગઈ!'

હાઉવાઉની પત્નીએ પૂછ્યું: 'હજી ઉઠ્યા નથી, ક્યાંય ગયા નથી, એટલામાં શાની ભૂલ થઈ ગઈ?'

હાઉવાઉએ નિસાસો નાખી કહ્યું: 'મરઘી હાથથી ગઈ! સિત્તેર પૈસાયે ગયા!'

પત્નીએ કહ્યું: 'શાની મરઘી ને શાના પૈસાની વાત કરો છો?'

હાઉવાઉએ પત્નીને સ્વપ્નાની વાત કરી કહ્યું: 'તે જ વખતે મેં સોદો પતાવી નાખ્યો હોત તો સારું થાત! હવે એ ઘરાક-'

એકદમ એ પાછો પથારીમાં પડ્યો, ને આંખો મીંચી દઈ હાથ લાંબો કરી બોલ્યો: 'ઘરાક, એ.......ઈ ઘરાક, પાછો આવ! લાવ સિત્તેર પૈસા! સોદો કબૂલ!'

(રમણલાલ સોની લિખીત બાળવાર્તા સંગ્રહ 'ચીની ચાઉમાઉ, એનો દીવાન હાઉવાઉ'માંથી, પ્રકાશક: શ્રી હરિહર પુસ્તકાલય, સુરત, પહેલી આવૃત્તિ: 1967)