ચીની ચાઉમાઉ, એનો દીવાન હાઉવાઉ (9): તળાવ ખાલી કરી ખેતી કરો!

ચીની રાજા ચાઉમાઉ એક વાર ખુશમિજાજમાં બેઠા હતા. ત્યાં કેટલાક માણસોએ આવીને કહ્યું, 'મહારાજ, અમારે ખેડવા માટે જમીન જોઈએ છે!'

રાજાએ તરત દીવાનને બોલાવી હુકમ કર્યો; 'આ લોકોને જમીન આપો!'

જમીનની તપાસ આવી. ફરતા ફરતા બધા એક તળાવના કિનારે આવ્યા. તળાવનો ફળદ્રુપ કાંપ જોઈ ખેડૂતોએ કહ્યું: 'પાણી ન હોય તો અહીં ખેતી ફક્કડ થાય!'

દીવાને રાજાને આ વાત કરી. રાજા કહે: 'તો તળાવ ખાલી કરી નાંખો! એમાં મને પૂછવા શું આવ્યા? દીવાન થયા છો તો આટલી અક્કલ નથી?'

દીવાનને આ સાંભળી ખોટું તો લાગ્યું, પણ ખોટું લગાડે એવો એ મૂર્ખ નહોતો. એણે તરત ખેડૂતોને હુકમ કરી દીધો: 'આ તળાવ તમારું! એનું પાણી કાઢી નાંખી ખેતી કરો!'

ખેડૂતોએ કહ્યું: 'દીવાનજી, એ પાણીનું શું કરીએ?'

વળી દીવાન વિચારમાં પડી ગયો. એ ગયો રાજા પાસે. રાજા સવાલ સાંભળી તરત બોલ્યો: 'આટલી અક્કલ નથી તમારામાં? બીજું એવડું તળાવ ખોદી એ પાણી એમાં નખાવી દો!'

દીવાન રાજાનો ખુલાસો સાંભળી ખુશ થઈ ગયો. તેણે એ મુજબ હુકમ કરી દીધો.

ત્યાર પછી તળાવનું શું થયું એ નથી રાજાને ખબર કે નથી દીવાનને ખબર.

(રમણલાલ સોની લિખીત બાળવાર્તા સંગ્રહ 'ચીની ચાઉમાઉ, એનો દીવાન હાઉવાઉ'માંથી, પ્રકાશક: શ્રી હરિહર પુસ્તકાલય, સુરત, પહેલી આવૃત્તિ: 1967)