કેરળ સ્કૂલના કાર્ટૂનિસ્ટોની પહેલી પેઢી શંકરની ગણીએ, એ પછીની પેઢી અબુ, વિજયન, કુટ્ટી વગેરેની ગણીએ તો કાર્ટૂનિસ્ટ અજિત નિનાન (હિન્દીમાં 'નૈનન' પણ લખાય છે) ને ત્રીજી પેઢીના ગણાવી શકાય. અબુના તે ભાણેજ થાય. અજિતનો જન્મ અલબત્ત, હૈદરાબાદમાં, અને તે કાર્યરત દિલ્હીમાં છે, છતાં તેમને કેરળ સ્કૂલના કાર્ટૂનિસ્ટ કહી શકાય. અજિતનાં કાર્ટૂનોની એક આગવી શૈલી છે, જે તેમને કેરળ સ્કૂલનાં કાર્ટૂનિસ્ટોથી અલગ તારવે છે. તેમણે 'ઈન્ડિયા ટુડે' જેવા સામયિકથી શરૂઆત કરી એટલે તેમનાં કાર્ટૂનો રંગીન રહેતાં. અત્યાર સુધી કેરળ સ્કૂલના કાર્ટૂનિસ્ટનાં કાર્ટૂન મોટે ભાગે અખબારમાં પ્રકાશિત થતા હોવાથી તે શ્વેતશ્યામ હતા. આમ, રંગને લઈને અજિતનાં કાર્ટૂન વિશેષ આકર્ષક જણાયા. આ ઉપરાંત તેમનાં કાર્ટૂનમાં રેખાઓ પાતળી તથા ચિત્રની બારીકીઓ ઘણી જોવા મળતી, જેને લીધે આખી ફ્રેમ ભરેલી જણાતી. કેરળ સ્કૂલનાં મોટા ભાગના કાર્ટૂનિસ્ટો ખપ પૂરતા ચિત્રાંકનો જ કરે છે એવું મારું નિરીક્ષણ છે. 'ટાઈમ્સ ઑફ ઈન્ડિયા'માં અજિતનાં કાર્ટૂનો આવતાં થયાં ત્યારે તેમાં પણ એ રંગીન આવતાં. આથી અજિતનાં કાર્ટૂનો રંગીન જ હોય એવી એક સામાન્ય છાપ પડી ગઈ.
 |
| અજિત નિનાન |
No comments:
Post a Comment