ચીની ચાઉમાઉ, એનો દીવાન હાઉવાઉ (14): ભારતના જાદુગરનું તુંબડું

એક વાર રાજા ચાઉમાઉ દરબાર ભરીને બેઠો હતો. ત્યાં એક સંગીતકારે આવી વીણા પર સંગીત શરૂ કર્યું.

રાજા કહે: 'દીવાનજી, આ શું ચાલે છે?'

દીવાન કહે: ' ભારતનો જાદુગર છે, એ તુંબડાની પાસે રુદન કરાવે છે!'

રાજા થોડી વાર સાંભળી રહ્યો.

પછી એકાએક બોલી ઉઠ્યો: 'પ્રધાનજી, જે તુંબડાને રડાવી જાણે તે આપણું શું નહીં કરે?'

દીવાને કહ્યું: 'આપણનેયે રડાવશે.'

રાજાએ રોતલ મોં કરી કહ્યું: 'બાપરે, પણ રડીરડીને હું થાકી ગયો છું. એને પાછો કાઢ!'

દીવાને કહ્યું: 'મહારાજ, બક્ષિસ માગે છે!'

'એકની બે આપ! પણ એને કાઢ! કહી દે કે ભારતમાં જઈને તુંબડાં રડાવ્યા કર; અમારે એની જરૂર નથી. અહીં બીજું રડવાનું ઘણું છે!'

દીવાને મોટી બક્ષિસ આપી ભારતીય સંગીતકારને વિદાય કરી દીધો.

(રમણલાલ સોની લિખીત બાળવાર્તા સંગ્રહ 'ચીની ચાઉમાઉ, એનો દીવાન હાઉવાઉ'માંથી, પ્રકાશક: શ્રી હરિહર પુસ્તકાલય, સુરત, પહેલી આવૃત્તિ: 1967)