ચાઉમાઉ રમતગમતનો જબ્બર પ્રેમી હતો, પણ તે સમૂહ રમતોને બદલે વ્યક્તિગત રમતો પર વધુ ભાર મૂકતો. જેમ કે, ગોળાફેંક, બરછીફેંક, ફેંકંફેંંક, ડીપફેક વગેરે...
નાનપણથી ચાઉમાઉ વિવિધ કદના ગોળા ફેંકવાનો મહાવરો કરતો રહ્યો હતો. તેણે જાહેર કરેલું કે એક વાર તેણે હવામાં ઉછાળેલો ગોળો છેક ચંદ્ર સુધી પહોંચેલો અને બે દિવસ પછી નીચે પૃથ્વી પર આવ્યો ત્યારે એને જે માટી ચોંટેલી એ ચંદ્રની ધરતીની હતી. આ માટી રાજ્યની પ્રયોગશાળામાં નમૂનાર્થે સચવાયેલી હતી. ચાઉમાઉનાં વિધાન એટલે કે ગોળા એવા હતા કે સામાન્ય સંજોગોમાં એ કોઈને ગળે ન ઊતરે. આને કારણે તે સતત અસામાન્ય સંજોગોનું નિર્માણ કરતો રહેતો. આથી લોકો તેની વાત સહેલાઈથી સ્વીકારી લેતા, એટલું જ નહીં, તેનો પ્રચારપ્રસાર પણ કરતા.
ચાઉમાઉ સતત એમ કહેતો કે પોતે કંઈ રાજવંશનું સંતાન નથી. ચીનના ઉદ્ધાર માટે ચીની દેવતાઓએ એને પસંદ કરીને ધરતી પર મોકલેલો છે. હકીકતમાં ગયા જનમમાં પોતે ચીનની દીવાલ પર હક્કા નૂડલ્સ અનેચાઈનીઝ રાઈસની લારી ચલાવતો હતો. એ લારીનો રંગ ઘેરો લાલ હતો, અને એની પર મોંમાંથી આગની જ્વાળાઓ ફેંકતા ડ્રેગનનું ચિત્ર દોરેલું હતું. ચીની દેવતાવાળી વાત તો લોકો આસાનીથી સ્વિકારી શકતા, પણ ચીનની દીવાલ પર લારીવાળી વાત ગળે ઉતારવામાં લોકોને મુશ્કેલી પડતી, કેમ કે, ચીનની દીવાલ પર કદી કોઈ લારીને ઊભા રહેવાની પરવાનગી મળી નહોતી. આમ છતાં, લોકો એ બાબતે ઝાઝો પ્રતિવાદ ન કરતા.
ધીમે ધીમે ચાઉમાઉએ પહેલાં સામાજિક અને પછી ઉજવણીઓમાં રાજકીય હસ્તક્ષેપ શરૂ કર્યો. ચીનમાં કોઈ તહેવારની ઉજવણી હોય હોય કે કોઈ કુંગ ફૂ સ્કૂલનો દીક્ષાંત સમારોહ હોય ત્યારે રાજના પ્રતિનિધિઓ પહોંચી જતા. પહેલાં તો તેમને જોઈને લોકો ગભરાઇ જતા, પણ પછી એ લોકો મોટું કાર્ડ અને મોટી કેક ધરતા. કહેતા કે ખુદ સમ્રાટ ચાઉમાઉએ આ મોકલ્યું છે. એ સ્વીકારીને આભારી કરશો. અને નહીં સ્વીકારો તો...! ચીની લોકોનું વાંચન સારું હોવાથી તેઓ બાકીનું વાક્ય પોતાની રીતે મનમાં પૂર્ણ કરી દેતા અને એ સ્વીકારી લેતા. એ પછી વ્યક્તિગત સ્તરે આ પ્રવેશ્યું. કોઈના જન્મદિનની ઉજવણી હોય, સીમંતપ્રસંગ હોય કે મૃત્યુ, ચાઉમાઉના પ્રતિનિધિઓ પહોંચી જતા. ચીનીઓને લાગવા માંડ્યું કે ચાઉમાઉ પોતાનો હિતેચ્છુ છે અને પોતાના લોકોની કેવી દરકાર લે છે!
ચીનના લોકો સમજુ હતા, નમકહલાલ હતા. તેમને થયું કે ચાઉમાઉ પ્રજા માટે જે નિંસ્બત દાખવે છે એનો બદલો શી રીતે વાળી શકાય! ધીમે ધીમે લોકોનાં પ્રતિનિધિમંડળ ચાઉમાઉની મુલાકાતે આવવા લાગ્યાં અને પોતાની ઈચ્છા દર્શાવવા લાગ્યા. ચાઉમાઉ આના માટે તૈયાર હતો. કહો કે આની જ એ પ્રતીક્ષા કરી રહ્યો હતો.
તેણે એ સૌને જણાવ્યું કે સૌએ રાજ્યના સૈન્યમાં જોડાઈ જવાનું છે. આ જાણીને પહેલાં તો લોકો ખચકાયા. પણ ચાઉમાઉ તરત બોલ્યો, 'તમે ગભરાતા નહીં. તમારે કંઈ ભાલાતલવાર નથી પકડવાના, કે નથી રણમેદાને જવાનું. અરે! લોહીનું ટીપું સુદ્ધાં વહાવવાનું નથી. ટોમેટો કૅચપનું પણ નહીં. પોતાને ઘેર જ રહેવાનું છે અને તમે જે કામ કરતા હો એ જ કરવાનું છે.' ચીનીઓને નવાઈ લાગી. આ કેવું સૈન્ય! આ કેવી લડાઈ! ચાઉમાઉએ કહ્યું, 'તમે હવે હાઉવાઉ પાસે જાવ. એ તમને બાકીનું સમજાવી દેશે. એ પછી તમે કાઉકાઉ પાસે જાવ. એ તમારા સેનાપતિ. તમને આદેશ એ આપશે.'
ચીનાઓએ એ બધા તબક્કા પૂરા કર્યા અને હોંશે હોંશે, હસતા હસતા સેનામાં જોડાઈ ગયા. કશાય શસ્ત્ર વિનાની, સૈનિક વિનાની એ સેના ચીનની સૌ પ્રથમ અહિંસક સેના બની રહી. એમાં સૈનિકોએ હિંસા કરવાની નહોતી. તેમણે કેવળ અમુક પ્રચાર જ કરવાનો હતો. બાકીનું બધું લોકો સંભાળી લેવાના હતા.
ચીનમાં અશ્વદળ, પાયદળ, ઊંટદળ વગેરે હતાં. આ નવા દળને 'ટ્રોલ દળ' નામ આપવામાં આવ્યું. આગળ જતાં આ નવા દળે ચીનના તમામ સશસ્ત્ર દળોને પાછળ રાખી દે એવી સિદ્ધિઓ નોંધાવી. એ દળની પરાક્રમગાથાઓ સાંભળીને ચીનની ભાવિ પેઢીઓ ઉછરતી રહેવાની હતી અને લીલાલહેર કરવાની હતી.
(રમણલાલ સોનીએ સર્જેલાં ચીની ચાઉમાઉ ને એનો દીવાન હાઉવાઉનાં મૂળ પાત્રો પર આધારિત નવી કથા)
No comments:
Post a Comment