ચીની ચાઉમાઉ, એનો દીવાન હાઉવાઉ (15): હાઉવાઉનું ઘોડું

નદીકિનારે ચીની રાજા ચાઉમાઉનો એક મહેલ હતો. ઉનાળામાં રાજા એ મહેલમાં જઈને રહેતા. એકવાર હાઉવાઉને ચાઉમાઉનો સંદેશો મળ્યો કે 'ગઈ કાલે મને ઊંઘ આવી નથી, માટે આવતી કાલે મને ઊંઘ આવે એ પહેલાં તમે આવીને મને મળી જજો.'

હાઉવાઉનું ઘર જરી દૂર હતું. સંદેશો મળતાં જ હાઉવાઉએ ઘોડો પલાણ્યો, ને સવાર થઈ એ રાજા ચાઉમાઉને મળવા ચાલ્યા.

હાઉવાઉનું ઘોડું જરી આળસુ હતું- એવું કે સો ચાબખા ખાય ત્યારે એક ડગલું આગળ ચાલે! હાઉવાઉને એ ઘોડું ઘણું જ પ્રિય હતું.

દીવાનપત્નીએ કહ્યું: 'ક્યાં ચાલ્યા અત્યારે આ ઘોડા પર સવાર થઈને?'

હાઉવાઉએ કહ્યું, 'આવતી કાલે રાજાને મળવાનું છે ખરું ને!'

પત્નીએ કહ્યું, 'આવતી કાલે મળવાનું છે ને? હજી તો આજ છે!'

હાઉવાઉએ કહ્યું, 'અરે! તું આટલું સમજતી નથી? જરી મને જો, મારા ઘોડાને જો, અને અક્કલ ચલાવ! મારો ઘોડો એવો રવાલ ચાલ ચાલે છે કે આજનો નીકળ્યો એ કાલે સાંજે રાજમહેલને દરવાજે મને પહોંચાડે તો હું નસીબદાર!'

દીવાનપત્નીએ કહ્યું, 'વાત તો ખરી!'

હાઉવાઉએ હસીને કહ્યું, 'આ તો દીર્ઘદૃષ્ટિનું કામ છે, રે, દીવાનપદું કંઈ સહેલું નથી!'

હાસ્તો, દીવાનપદું કંઈ સહેલું નથી!

(રમણલાલ સોનીએ લખેલી, સુરતના શ્રી હરિહર પુસ્તકાલય દ્વારા પ્રકાશિત બાળકથાસંગ્રહ 'ચીની ચાઉમાઉ, એનો દિવાન હાઉવાઉ' , પ્રકાશન: 1967)