ચીની ચાઉમાઉ, એનો દીવાન હાઉવાઉ (3): અમલદારી જાહેરનામું

 ચાઉમાઉના રાજ્યની બીજી પણ ઘણી વાતો જાણવા જેવી છે. ચાઉમાઉના અમલદારો, શેઠશાહુકારો બધા કંઈ કમ નહોતા. દરેક પોતપોતાના ક્ષેત્રમાં નમૂનેદાર હતા.

એવા બે અમલદારોની વાત છે. બન્ને આંખે બહુ જ ઓછું દેખતા હતા. એમના હાથનાં આંગળાંયે એમને દેખાતાં નહીં, તોયે રોજ લાંબા લાંબા હુકમો બહાર પાડવાનો એમનો શિરસ્તો હતો.

એક વાર બન્ને જણા સાથે કચેરીમાં આવ્યા. પણ બારણાં આગળ જ ઊભા રહી ગયા.

એક અમલદારે દીવાલ ભણી ઊંચું જોઈ કહ્યું, 'એઈ જુઓ, પેલો મારો નવો હુકમ! મેં એમાં જાહેર કર્યું છે કે ચીની સાધુઓ ભારતમાંથી ધાર્મિક ગ્રંથો લઈ આવ્યા છે તે પાછા લઈ જવા માટે ભારત ચીન પર ચડાઈ કરવાનું છે! માટે સાવધાન!

બીજા અમલદારે કહ્યું: 'અરે પણ પણે મારો હુકમ લટકે છે એ તો જુઓ. મેં એમાં જાહેર કર્યું છે કે ભારતે ચીન પર ચડાઈ કરી છે, માટે સાવધાન!'

પછી તો બન્ને અમલદારો એક સાથે બોલવા લાગ્યા: 'સાવધાન! સાવધાન! સાવધાન!'

એટલામાં દીવાન હાઉવાઉ ત્યાં આવી પહોંચ્યા. આ બન્નેને ભીંત સામે જોઈ સાવધાન સાવધાન બોલતા જોઈ તેમણે કહ્યું: 'અરે, ત્યાં અદ્ધર શું જોયા કરો છો?'

બન્નેએ જવાબ દીધો: 'નવું જાહેરનામું વાંચીએ છીએ!'

હાઉવાઉએ કહ્યું: 'ક્યાં છે જાહેરનામું? હું તો ભીંત પર કશું દેખતો નથી! ભીંત તો કોરી છે.'

બન્ને જણાએ કહ્યું: 'હેં, તો શું એટલામાં કોઈએ એ ફાડી નાખ્યું? કેવી નાલાયક છે આ દુનિયા!'

(રમણલાલ સોની લિખીત બાળવાર્તા સંગ્રહ 'ચીની ચાઉમાઉ, એનો દીવાન હાઉવાઉ'માંથી, પ્રકાશક: શ્રી હરિહર પુસ્તકાલય, સુરત, પહેલી આવૃત્તિ: 1967)