સાહિત્ય- બાહિત્ય (5)

 "સર, આપના આ પુસ્તક 'સાહિત્ય-બાહિત્ય' વિશે કંઈક કહેશો?"

"અફ કોર્સ! જુઓ, એની છાપેલી કિંમત 130/રૂ. છે, પણ વળતર અને પોસ્ટેજ સાથે રૂ. 120/માં એ મળી શકે છે અને એને 98252 90796 નંબર પર વૉટ્સેપ દ્વારા મંગાવી શકાય છે. ઈઝ ધેર એનીથિંગ યુ વોન્ટ મોર?"

"ઓહ, સર! આપ પણ...આ કંઈ ટી.વી.પર ડીબેટ નથી કે આપ આપનો એજેન્ડા જ ચલાવ્યે રાખો. મારું એમ પૂછવું હતું કે એ પુસ્તક શેના વિશે છે, એનો શો વિષય છે, આપની સર્જનપ્રક્રિયા....ઓકે. ચાલો. મને બે વાક્યોમાં કહો કે એ પુસ્તક મારે શા માટે ખરીદવું જોઈએ."

"બસો-અઢીસો રૂપિયાનો ગમે એવો પીત્ઝા ખાઈને પેટ બગાડવા કરતાં માત્ર એકસો ને વીસ રૂપિયામાં મગજ બગાડવું સારું. અને એય તે ઘેરબેઠે. ઓકે?"

"સર, યુ ક્રોસ્ડ ધ લિમિટ. આપે ત્રણ વાક્યોમાં જવાબ આપ્યો. 'ઓકે' પણ સ્વતંત્ર વાક્ય જ ગણાય."

"ભઈ, તું મારી લિમિટ બતાવવાને બદલે તારી લિમિટમાં રહે ને? ચાલ, તું મને કહે કે તું આ પુસ્તક શા માટે ખરીદે? વાક્યોની કોઈ લિમિટ નથી, ઓકે?"

"પહેલું કારણ તો એ કે એક ચોપડી ખરીદવાથી હું કેટલા બધા પરિવારોને સપોર્ટ કરું છું. લેખક, પ્રકાશક, પ્રિન્ટર, બાઈન્ડર, વિક્રેતા, પેકેજિંગ કરનાર, કુરિયરવાળો....એન્ડ મેની મોર!"

"હેં????"

"હજી સાંભળો તો ખરા. એકસો વીસ રૂપિયાની વેલ્યુ શું આ જમાનામાં? સાહેબ, ગાયોને લીલું ઘાસ નાખવા જઈએ ને તો એનો પૂળોય દોઢસોનો આવે છે. અને એમાંય અડધું ઘાસ સૂકું હોય. હવે સાહેબ, મને તો મારા ખાનદાનમાંથી જ સંસ્કાર મળેલા છે કે આપણે કમાય એટલું પુણ્ય કમાઈ લેવું. સાહેબ, તમે જ કહો. આ ભાવે આટલું પુણ્ય મળે તો કોઈ છોડે?"

"..............."

"હેલો! એકસો આઠ? અહીં એક ભાઈ પડ્યા છે. ના, ના. કોઈએ ટક્કર નથી મારી. લોહીબોહી નથી નીકળ્યું. ઈન્ટર્નલ ઈન્જરી લાગે છે...ઓકે, સાત-આઠ મિનીટમાં ને? ફાઈન. એન્ડ વન મોર થિંગ! એકસો ને વીસ રૂપિયા છૂટા રાખજો."