કવિતાબવિતા (16)

કોઈને દેખાય ઝલક કોકની કોઈનાં પગલાંમાં,

કોકને ઘૂસાડવાનો ઉદ્યમ ચાલ્યો છે કોકના ડગલામાં.

માપપટ્ટી મિલીમીટરની ચલણી બની રહી બધે,

હઠયોગીનાં દર્શન થાય એક પગે ઊભેલા બગલામાં.

સંન્યાસ પણ લેવાય હવે માયા વિસ્તારવા કાજે,

ભર્તૃહરિ જુએ ઝલક દીપિકા*ની હવે પિંગલામાં

સ્માર્ટ ટી.વી. બિરાજમાન થયું વ્યાસપીઠે,

ઝૂંપડાં વિસ્તરી રહ્યાં છે સતત બંગલામાં.

(* દીપિકા = પદુકોણ અટક ધરાવતી અભિનેત્રી, લખ્યા તારીખ: 30-1-2020)